NEWS
এইবাৰ ‘‘মৌত টক্ সে ছু কে চলা নহী যায়েগা…’’- নৱাজুদ্দিন ছিদ্দিকীৰ দাইল এইবাৰ নগলিব। এইবাৰ ছিদ্দিকীক শাস্তি দিবলৈ চলমান খান বা তেনে কোনো হী-মেন নায়কৰ আৱশ্যক নহ’ব। এইবাৰ নিজৰ কৃতকৰ্মৰ বাবেই ফাঁচীকাঠত ওলমিব লাগিব ছিদ্দিকী। হয়, ঠিকেই ধৰিছে, বলীউডৰ অন্যতম প্ৰতিভাৱান অভিনেতা নৱাজুদ্দিন ছিদ্দিকিক এইবাৰ অন্য এক ৰূপত দেখা যাব। অসমৰ এজন ন্যায়াধীশ উপেন্দ্ৰ নাথ ৰাজখোৱাৰ চৰিত্ৰত অভিনয় কৰিব। ন্যায়াধীশ ৰাজখোৱা, যি চাৰিটাকৈ ম’টিভলেছ হত্যাকাণ্ডৰ বাবে মৃত্যুদণ্ডৰে দণ্ডিত কৰা হৈছিল। এইবাৰ উপেন্দ্ৰ নাথ ৰাজখোৱাৰ এই জঘন্য অপৰাধৰ সন্দৰ্ভত এখন চিনেমা নিৰ্মাণ কৰিব বলীউডেয। এখন বায়’পিক। এজন বিচাৰকৰ সন্দৰ্ভত, হয়তো দেশ তথা বিশ্বৰ ভিতৰতেই একমাত্ৰ বিচাৰকৰ যাক চাৰিটাকৈ হত্যাৰ অপৰাধত মৃত্যুদণ্ড দিয়া হৈছিল। শেহতীয়াকৈ নৱাজুদ্দিন ছিদ্দিকিৰ ভাতৃ তথা ছবিখনৰ প্ৰযোজক ফৈজুদ্দিন ছিদ্দিকিয়ে এই কথা নিশ্চিত কৰিছে। নিঃসন্দেহে যোৱা শতিকাৰ সত্তৰৰ দশকৰ আৰম্ভণিতে সংঘটিত দেশজুৰি আলোড়ণৰ সৃষ্টি কৰা এই হত্যাকাণ্ডৰ ৰূপালী পৰ্দাৰ উপস্থাপন মনোৰম হ’ব। চিনেমাখন চোৱাৰ পূৰ্বে উপেন্দ্ৰনাথ ৰাজখোৱা কোন, তেওঁ কাক, কেনেকৈ হত্যা কৰিছিল জানিবৰ মন নাযায়নে! ন্যায়াধীশ ৰাজখোৱাৰ কলংকিত অধ্যায় ১৯৬৯ চনৰ কথা। নামনি অসমৰ ধুবুৰীৰ ছেচন আদালতত নতুন ন্যায়াধীশ নিযুক্তি- উপেন্দ্ৰ নাথ ৰাজখোৱা। ৰাজখোৱাই ১৯৬৯ চনৰ কোনোবা এটা সময়ত ধুবুৰীত জিলা আৰু অধিবেশন ন্যায়াধীশ হিচাপে যোগদান কৰে। প্ৰথমে তেওঁ অকলে ধুবুৰীলৈ আহি চাৰ্কিট হাউচত থাকে। ইয়াৰ পিছত তেওঁ জিলা আৰু ছেচন ন্যায়াধীশ ধুবুৰীৰ চৰকাৰী বাসগৃহলৈ স্থানান্তৰিত হয়, ৰাজখোৱাৰ পৰিয়ালত তেওঁৰ পত্নী পুতুলি ৰাজখোৱা ওৰফে পুতুল ৰাজখোৱা আৰু তেওঁৰ কন্যা নিৰ্মালী ওৰফে লিনু ৰাজখোৱা, জোনালী ওৰফে লুনা ৰাজখোৱা আৰু ৰূপালী ওৰফে ৰূপলেখা ওৰফে ভাণ্টু ৰাজখোৱা থাকে। ১৯৬৯ চনৰ পূজাৰ বন্ধৰ দিনত ৰাজখোৱাৰ পত্নী আৰু তিনি কন্যা ধুবুৰীলৈ আহি তেওঁৰ লগত থাকিল। কনিষ্ঠা কন্যা দুগৰাকী ক্ৰমে লুনা আৰু ভাণ্টুক কলেজ পুনৰ খোলাৰ লগে লগে গুৱাহাটীলৈ ওভতি যায়। লুনা আৰু ভাণ্টু গুৱাহাটীলৈ যোৱাৰ পিছত ৰাজখোৱাই পত্নী আৰু ডাঙৰ কন্যা লিনুৰ ধুবুৰীতে থাকিবলৈ লয়। ১৯৭০ চনৰ ১৪ জানুৱাৰীত মাঘ বিহুৰ কিছুদিন আগতে ৰাজখোৱাই এদিন জিলা ন্যায়াধীশ আদালতৰ পিয়ন বিগন প্ৰসাদ ৰাউটক অভিযুক্ত ৰাজখোৱাৰ শোৱনি কোঠাৰ সংলগ্ন বাথৰুমৰ ওচৰত থিয় হৈ থকা গছৰ কাণ্ড এটা খান্দিবলৈ কয়। সেই অনুসৰি কাণ্ডটো খন্দা হয়। ইয়াৰ পাছত ৰাজখোৱাই বিগানক কাণ্ডটোৰ গোটেই শিপাসমূহ উভালি পেলাবলৈ কয়। ৰাজখোৱাই পৰৱৰ্তী সময়ত শিপা উভলাৰ পাছত সৃষ্টি হোৱা গাঁতটো ভৰাই নিদিবলৈ কয়। তেওঁ তাত ফুলৰ গছ খেতি কৰিব বুলি জনাইছিল। কিছুদিন পাছত ৰাজখোৱাই তেওঁৰ সৈতে কাম কৰা পিয়ন চাহিদক আন এটা গাঁত খান্দিবলৈ দিলে। এই গাঁতটো জিলা ন্যায়াধীশৰ বাসগৃহৰ চৌহদৰ ভিতৰত ৰাধাৰ কোৱাৰ্টাৰৰ পূব দিশত খান্দিবলৈ দিছিল। পিয়নসকলক কোৱা হৈছিল যে সেই গাঁতটোৰ সহায়ত কোচবিহাৰৰ পৰা অনা বিশেষ ফুলৰ গছ কেজোপমান ৰোপণ কৰা হ’ব। ষড়যন্ত্ৰ আৰু হত্যাকাণ্ড- ১৯৭০ চনৰ ১০ ফেব্ৰুৱাৰীৰ সৰস্বতী পূজাৰ দিন। ৰাজখোৱাই তেওঁৰ পিয়ন, অৰ্ডাৰলি সকলক সৰস্বতী পূজা চাবলৈ যাবলৈ দিছিল। নিশা ৮.৩০ বজাত তেওঁলোক পূজা চাই উভতি আহি ৰাজখোৱাই পত্নী আৰু ডাঙৰ ছোৱালীজনীৰ সৈতে জুইশলাৰ কাষত বহি থকা দেখিছিল। সেই দিনাৰ পৰা দুয়োগৰাকী মহিলাক কোনেও ক’তো দেখা নাপালে। আচলতে ৰাজখোৱাৰ কোৱাৰ্টাৰ চৌহদত দুটা গাঁত খন্দা দিনৰ পৰাই ষড়যন্ত্ৰ আৰম্ভ হৈছিল। কিন্তু ইয়াত আৰু যোগ কৰিবলগীয়া আছে। অৱশ্যেই সকলো তথ্য পোহৰলৈ আহিছিল আৰক্ষীয়ে ৰাজখোৱাক গ্ৰেপ্তাৰ কৰাৰ পিছত জেৰা কৰাৰ পিছত। অসম আৰক্ষীৰ তদানীন্তন আই জি পি বাৰাদা শৰ্মাৰ আদালতত দিয়া বক্তব্যত কোৱা হৈছে- “শ্ৰী ইউ এন ৰাজখোৱাই মোৰ আগত স্বীকাৰোক্তি দিছিল যে তেওঁ শ্ৰী উমেশ বৈশ্য নামৰ তেওঁৰ ঘৰুৱা কামকৰা লোকজনৰ সৈতে ১০ ফেব্ৰুৱাৰীৰ মাজনিশা ১২ বজাৰ পাছত তেওঁৰ পত্নী আৰু ডাঙৰ কন্যাক হত্যা কৰিছিল। ২৫ফেব্ৰুৱাৰীত শ্ৰী ইউ. এন. ৰাজখোৱাই তেওঁৰ নুমলীয়া কন্যা দুগৰাকী হত্যা কৰিলে।” পৰৱৰ্তী সময়ত পোহৰলৈ আহে যে এই কামৰ বাবে ৰাজখোৱাৰ ঘৰৰ লগুৱা উমেশ বৈশ্যক তেওঁ ১০০০ টকা দিছিল। ধুবুৰী জিলা আৰু ছেচন ন্যায়াধীশৰ বাসভৱনৰ চৌহদত আটাইকেইটা মৃতদেহ পুতি থোৱা হৈছিল। উল্লেখ্য, চিকিৎসকৰ প্ৰতিবেদনত ৰাজখোবাৰ পত্নী-কন্যাৰ মৃত্যুৰ কাৰণ ৰক্তক্ষৰণৰ বাবেই হৈছে বুলি উল্লেখ কৰিছে। কিদৰে ৰাজখোবাই সকলোকে বিপথে পৰিচালিত কৰিছিল! জ্যেষ্ঠ আৰক্ষী বিষয়া বাৰাদা শৰ্মাই আদালতত স্পষ্টভাৱে উল্লেখ কৰিছে যে ১৯১৭০ চনৰ মে’ মাহত তেওঁ ৰাজখোৱাৰ পত্নী আৰু তিনিওগৰাকী কন্যাৰ ৰহস্যজনকভাৱে নিৰুদ্দেশ হোৱাক লৈ সন্দেহ কৰিবলৈ আৰম্ভ কৰিছিল। সেই কাৰণেই তেওঁ ১০৭০ চনৰ মে’ মাহত ফোনযোগে ৰাজখোৱাৰ শহুৰেকৰ পৰিয়ালৰ লোক আৰু অন্যান্য সম্পৰ্কীয়সকলক এই বিষয়ে অৱগত কৰিছিল। ৰাজখোৱাৰ সম্পৰ্কীয় আৰু সেই সময়ত অইল ইণ্ডিয়াত কৰ্মৰত অজিত শৰ্মাই দিল্লীতবাস কৰিছিল। চাৰিও মাতৃ-কন্যা অজিত শৰ্মাৰ ঘৰলৈ গৈছিল নেকি বুলিও তেওঁৰ সৈতে যোগাযোগ কৰা হৈছিল। উল্লেখ কৰি থোৱা ভাল যে সময়ে সময়ে ৰাজখোৱাই বক্তব্য দিছিল যে তেওঁৰ পত্নী আৰু কন্যা সন্তানসকল কোকৰাঝাৰ, দিল্লী আৰু দাৰ্জিলিংলৈ গৈছিল। আৰক্ষী বিষয়া হোৱাৰ বাবেই শৰ্মাই কিবা ভুল অনুমান কৰিব পাৰিছিল আৰু নিজৰ দ্বাৰা তদন্ত আৰম্ভ কৰিছিল। আনকি পত্নী আৰু ডাঙৰ কন্যাক হত্যা কৰাৰ পাছত গুৱাহাটীত থকা দুই কন্যাক ধুবুৰী গৈ পোৱাৰ পাছত তেওঁলোকক কোৱা হৈছিল যে ৰাজখোৱাৰ পত্নী, অৰ্থাৎ তেওঁলোকৰ মাতৃ কোৱাৰ্টাৰৰ ভিতৰতেই এটা ভয়ংকৰ দুৰ্ঘটনাত পতিত হৈ মৃত্যু হৈছিল আৰু সেই দুখতে কন্যায়ো চৰম সিদ্ধান্ত লৈছিল। পাছত নুমলীয়া দুই কন্যাক হত্যা কৰাৰ পাছত ৰাজখোৱাই কেতিয়াবা পত্নী কন্যা ডাৰ্জিলিঙলৈ যোৱা বুলি কয়, কেতিয়াবা কয় কোকৰাঝাৰ বা দিল্লীলৈ যোৱা বুলি কৈছিল। অৱশেষত ৰাজখোৱা এদিন ধুবুৰীৰ পৰা অদৃশ্য হৈ পৰে আৰু পিছত অসম আৰক্ষীয়ে শিলিগুৰিৰ এখন হোটেলৰ পৰা গ্ৰেপ্তাৰ কৰে। পিছত আদালতৰ প্ৰক্ৰিয়া আৰম্ভ হয় আৰু তেওঁক মৃত্যুদণ্ডৰ পুৰস্কৃত কৰি যোৰহাট কাৰাগাৰৰ ভিতৰত ফাঁচী দিয়া হয়। অভিযুক্ত উমেশ বৈশ্যক ভাৰতীয় দণ্ডবিধিৰ ধাৰা ৩০২/৩৪ আৰু ভাৰতীয় দণ্ডবিধিৰ ধাৰা ৩০২/৩৪ৰ অধীনত দোষী সাব্যস্ত কৰা হৈছে আৰু তেওঁক ভাৰতীয় দণ্ডবিধিৰ ধাৰা ৩০২/৩৪ৰ অধীনত আজীৱন কাৰাদণ্ডৰ শাস্তি প্ৰদান কৰা হৈছে। কেইবছৰমান পূৰ্বে জেলৰ পৰা মুক্তি পাইছিল। এনে এটা ঘটনাক লৈয়েই বলিউডত নিৰ্মাণ হ’বলৈ গৈ আছে এখন নতুন, ৰহস্যধৰ্মী চলচ্চিত্ৰ। অৱশ্যে এইখিনিতে উল্লেখ কৰি থোৱা ভাল যে ইয়াৰ পূৰ্বেও অসমৰ ৰহস্য সাহিত্যিক সত্যৰঞ্জন বৰুৱাৰ কাহিনীৰ আধাৰত ‘‘এ’টৱাৰ’’ নামৰ এখন হিন্দী ছবি নিৰ্মাণ কৰা হৈছিল। None
What’s New
Spotlight
Advertisement
Featured News
Latest From This Week
Popular News
