NEWS
শ্বেখ হাছিনাই (Sheikh Hasina) বাংলাদেশৰ প্ৰধানমন্ত্ৰী পদৰ পৰা পদত্যাগ কৰি ভাৰতলৈ পলায়ন কৰাৰ পাছতো অব্যাহত আছে ৰাজনৈতিক অস্থিৰতা। তাৰ মাজতেই বৃহস্পতিবাৰে ড° মহম্মদ ইউনুছৰ (Muhammad Yunus) নেতৃত্বত বাংলাদেশত গঠন হ’ল অন্তৰ্ৱৰ্তীকালীন চৰকাৰ। শ্বেখ হাছিনাই বাংলাদেশ এৰি যোৱাৰ পাছত প্ৰধানমন্ত্ৰীৰ বাসগৃহ ‘গণভৱন’ লণ্ডভণ্ড কৰিছিল (Bangladesh Protest) প্ৰতিবাদী জনতাই। ‘গণভৱন’ৰ ভিতৰে-বাহিৰে অবৰ্ণনীয় পৰিস্থিতিৰ সৃষ্টি কৰিছিল উন্মত্ত জনতাই। যাৰ ফলত অন্তৰ্ৱৰ্তীকালীন চৰকাৰৰ মুৰব্বী ড° মহম্মদ ইউনুছে ক’ত থাকিব, তাক লৈ সৃষ্টি হৈছে অনিশ্চয়তা। বাংলাদেশী সংবাদ মাধ্যম ‘Prothom Alo’ৰ মতে, এই মুহূৰ্তত ‘গণভৱন’ৰ পৰিস্থিতি এতিয়া বাসপোযোগী নহয়। সূত্ৰ অনুসৰি, অন্তৰ্ৱৰ্তীকালীন চৰকাৰৰ মুৰব্বী হিচাপে দায়িত্ব গ্ৰহণ কৰাৰ পাছত ড° মহম্মদ ইউনুছক ‘যমুনা’ ভৱনত ৰখাৰ ব্যৱস্থা কৰা হৈছে। কাৰ্যভাৰ গ্ৰহণ কৰাৰ পাছত ঢাকাৰ ৰামনা আৰক্ষী থানা এলেকাৰ মিণ্টো ৰোডৰ কাষত থকা ‘যমুনা’ ভৱনটোৱে অন্তৱৰ্তীকালীন চৰকাৰৰ মুৰব্বীগৰাকীৰ বাসভৱন আৰু কাৰ্যালয় হ’ব। ‘যমুনা ভৱন’ প্ৰকৃততে ৰাষ্ট্ৰীয় অতিথিশালা। অতীতত যেতিয়াই মুৰব্বী নিযুক্ত কৰাৰ প্ৰয়োজন হৈছিল, তেওঁলোকক ইয়াত স্থান দিয়া হৈছিল। ন্যায়াধীশ হাবিবুৰ ৰহমান ১৯৯৬ চনত অন্তৰ্ৱৰ্তীকালীন চৰকাৰৰ মুৰব্বী আছিল। সেই সময়ত তেওঁক ‘যমুনা’ত ৰখাৰ ব্যৱস্থা কৰা হৈছিল। ২০০১ চনত অন্তৰ্ৱৰ্তীকালীন চৰকাৰৰ মুৰব্বী লতিপুৰ ৰহমান ‘যমুনা’ত আছিল। ২০০৮ চনত যেতিয়া সামৰিক বাহিনী নিয়ন্ত্ৰিত অন্তৰ্ৱৰ্তীকালীন চৰকাৰ আছিল, তেতিয়াও মুৰব্বী ফখৰুদ্দিন আহমেদক ‘যমুনা’ত স্থান দিয়া হৈছিল। আৰু এতিয়া বাংলাদেশৰ ৰাজহুৱা গৃহ নিৰ্মাণ বিভাগৰ সঞ্চালক মহম্মদ শ্বাহিদুল ইছলামে নিশ্চিত কৰিছে যে অন্তৰ্ৱৰ্তীকালীন চৰকাৰৰ মুৰব্বীৰ বাসগৃহ হিচাপে ‘যমুনা’ক বাছনি কৰা হৈছে। কেৱল অতীতৰ মুৰব্বীৱে নহয়, বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাও এসময়ত ‘যমুনা’ত বাস কৰিছিল। ২০০৯ চনত যেতিয়া ‘গণভৱন’ৰ পুনৰ্নিমাণৰ কাম চলি আছিল, সেই সময়তো প্ৰধানমন্ত্ৰীৰ বাসগৃহ অস্থায়ীভাৱে ‘যমুনা’লৈ স্থানান্তৰিত কৰা হৈছিল। অৱশ্যে, এই ‘যমুনা ভৱন’ক দীৰ্ঘদিন ধৰি বাংলাদেশৰ কোনো ৰাষ্ট্ৰপ্ৰধানৰ বাসস্থান হিচাপে ব্যৱহাৰ কৰা হোৱা নাছিল। অন্তৰ্ৱৰ্তীকালীন চৰকাৰৰ মুৰব্বী ক’ত থাকিব, সেই বিষয়টো চূড়ান্ত হোৱাৰ লগে লগে ‘যমুনা’ক পুনৰ সুসজ্জিত কৰাৰ কাম আৰম্ভ হৈছে। শ্ৰমিকসকলে বৃহস্পতিবাৰে পুৱাৰ পৰা দুমহলীয়া অতিথিশালাটো পৰিষ্কৰণৰ কাম আৰম্ভ কৰিছে। None
What’s New
Spotlight
Advertisement
Featured News
Latest From This Week
Popular News
