NEWS
সাংসদ কংগনা ৰাণাৱটক ধমক দিছে ভাৰতীয় জনতা পাৰ্টীয়ে। দেশত আলোড়ন তোলা কৃষক বিদ্ৰোহ সন্দৰ্ভত কংগনাই কৰা মন্তব্যই বিতৰ্কৰ সৃষ্টি কৰাৰ পাছত সাংসদগৰাকীক বিজেপি নেতৃত্বই ভৰ্ৎসনা কৰিছে। এক স্পষ্টীকৰণৰ সৈতে কংগনা ৰাণাৱটৰ মন্তব্যই দলৰ মতামতক প্ৰতিনিধিত্ব নকৰে বুলি বিজেপিয়ে আজি ঘোষণা কৰে। বিজেপিৰ ৩৮ বছৰীয়া সাংসদগৰাকীয়ে কৃষকৰ প্ৰতিবাদৰ ফলত চৰকাৰে শক্তিশালী পদক্ষেপ গ্ৰহণ নকৰিলে ভাৰতত বাংলাদেশসদৃশ সংকটৰ সৃষ্টি হ’ব পাৰে বুলি পৰামৰ্শ দিয়াৰ এদিন পাছতে বিজেপিয়ে প্ৰকাশ কৰিছে অসন্তুষ্টি। বিজেপিয়ে এক বিবৃতিযোগে কয়, ‘‘কংগনা ৰাণাৱটক দলৰ হৈ নীতিগত বিষয়ত কথা কোৱাৰ অনুমতি দিয়া হোৱা নাই আৰু এনে কৰিবলৈ অনুমতি দিয়া হোৱা নাই। বিজেপিয়ে ৰাণাৱটক ভৱিষ্যতে এনেধৰণৰ মন্তব্য দিয়াৰ পৰা বিৰত থাকিবলৈ নিৰ্দেশ দিছে।’’ ইয়াৰ পূৰ্বে হাৰিয়ানা আৰু পঞ্জাবৰ বিজেপি নেতাসকলে হিমাচল প্ৰদেশৰ মাণ্ডিৰ সাংসদগৰাকীক আপত্তিজনক মন্তব্য কৰাৰ পৰা বিৰত থাকিবলৈ পৰামৰ্শ দিছিল। পঞ্জাব বিজেপিৰ নেতা হৰজিৎ গ্ৰেৱালে কয়, ‘‘কৃষকসকলৰ ওপৰত কথা কোৱাটো কংগনাৰ বিভাগ নহয়, কংগনাৰ বক্তব্য ব্যক্তিগত। প্ৰধানমন্ত্ৰী মোদী আৰু বিজেপি কৃষক-অনুকূল। বিৰোধী দলবোৰে আমাৰ বিৰুদ্ধে কাম কৰি আছে আৰু কংগনাৰ বক্তব্যয়ো একেটাই কৰি আছে। তেওঁ সংবেদনশীল বা ধৰ্মীয় বিষয়, ধৰ্মীয় সংগঠনৰ ওপৰত এনে মন্তব্য দিয়া উচিত নহয়।’’ কংগনাৰ মন্তব্যত প্ৰতিক্ৰিয়া ব্যক্ত কৰি কংগ্ৰেছ নেতা ৰণদীপ সুৰজেৱালাই বিজেপি সাংসদগৰাকীক ‘সোনকালে সুস্থ হ’বলৈ’ আহ্বান জনায়। উচটনিমূলক মন্তব্যৰ বাবে পৰিচিত ৰাণাৱট শেহতীয়াকৈ বাতিল হোৱা তিনিখন কৃষি আইনৰ বিৰুদ্ধে কৃষকসকলৰ প্ৰতিবাদক পূৰ্বৰে পৰা তীব্ৰ সমালোচনা কৰি আহিছে। ২০২০ চনত তেওঁ প্ৰতিবাদত অংশগ্ৰহণ কৰি থকা পঞ্জাবৰ এগৰাকী মহিলা কৃষকক ভুলকৈ চিনাক্ত কৰি আৰু তেওঁক বিলকিছ বানো বুলি অভিহিত কৰিছিল। নাগৰিকত্ব সংশোধনী আইনবিৰোধী আন্দোলনৰ সময়তো সৰব হৈ পৰিছিল কংগনা ৰাণাৱট। উল্লেখযোগ্য যে ৰাণাৱটক চণ্ডীগড় বিমানবন্দৰত এগৰাকী মহিলা কেন্দ্ৰীয় ঔদ্যোগিক সুৰক্ষা বাহিনীৰ (চিআইএছএফ) কনিষ্টবলে চৰিওৱাৰ পাছত দেশজুৰি সৃষ্টি হৈছিল তীব্ৰ বিতৰ্ক। None
What’s New
Spotlight
Advertisement
Featured News
Latest From This Week
Popular News
