NEWS
সেনা বাহিনীৰ চাপত অৱশেষত দেশ এৰিলে বাংলাদেশৰ প্ৰধানমন্ত্ৰী শ্বেখ হাছিনাই। দুপৰীয়া ঢাকাৰ পৰা উৰা মাৰে হাছিনাৰ হেলিকপ্টাৰ। তাৰ পিছতে বাংলাদেশৰ সেনা প্ৰধান ৱাকাৰ উজ জামানে ঘোষণা কৰে, প্ৰধানমন্ত্ৰী পদৰ পৰা পদত্যাগ কৰিছে শ্বেখ হাছিনাই। হাছিনাৰ পদত্যাগৰ দাবীতেই আন্দোলনত উত্তাল হৈ পৰিছিল বাংলাদেশ। আজি দুপৰীয়া বিভিন্ন ৰাজনৈতিক দল, দেশৰ বিশিষ্ট নাগৰিক, আন্দোলনৰত ছাত্ৰ সমাজৰ প্ৰতিনিধিৰ সৈতে বৈঠকত বহে বাংলাদেশৰ সেনা প্ৰধান ৱাকাৰ উজ জামান। তাৰ পিছৰে পৰা হাছিনাৰ পদত্যাগৰ কথা ওলাইছিল। এই বৈঠকৰ কিছু সময় পিছতে হাছিনাৰ পদত্যাগৰ কথা ঘোষণা কৰে সেনা বাহিনীৰ কাৰ্যালয়ৰ ফালৰ পৰা। তেওঁ আৰু জনায়, আন্দোলনৰত ছাত্ৰসকলৰ দাবী মানিয়ে অন্তৰ্ৱৰ্তীকালীন চৰকাৰ গঠনৰ বাবে বাংলাদেশৰ ৰাষ্ট্ৰপতিৰ ওচৰত তেওঁলোকে দাবী জনাব। হাছিনাই দেশ এৰাৰ পিছতে প্ৰধানমন্ত্ৰীৰ বাসভৱন গণভৱন দখল কৰে বিক্ষোভকাৰীসকলে। লুটপাত আৰম্ভ হয়। ঢাকাত বংগবন্ধু মুজিবুৰ ৰহমানৰ মূৰ্তি ভঙাৰো চেষ্টা চলোৱা দেখা যায় বিক্ষোভকাৰীক। আনহাতে, ঢাকাৰ এটা সেনা ছাউনীৰ পৰা সেনাৰ নিৰাপত্তাত হাছিনাক লৈ উৰা মাৰে এখন হেলিকপ্টাৰ। কিছু সময়ৰ পিছতে ভাৰতৰ আগৰতলাত অৱতৰণ কৰে সেই হেলিকপ্টাৰখন। কাৰ্ফিউৰ মাজতে আজি বাংলাদেশত মাৰ্চ টু ঢাকা অভিযানৰ আহ্বান জনাইছিল আন্দোলনকাৰীসকলে। ৰাজধানী ঢাকাৰ ছায়েন্স লেব অঞ্চলসহ বিভিন্ন স্থানত ভিৰ কৰিবলৈ আৰম্ভ কৰে তেওঁলোকে। উল্লেখযোগ্য যে দেওবাৰৰ পৰা আন্দোলনকাৰী, আৱামীলীগৰ সমৰ্থক আৰু আৰক্ষীৰ মাজত আৰম্ভ হোৱা সংঘৰ্ষত শতাধিক লোকৰ মৃত্যু হৈছে বাংলাদেশত। নতুনকৈ আৰম্ভ হোৱা বিক্ষোভ, আন্দোলনত প্ৰধানমন্ত্ৰী শ্বেখ হাছিনাৰ পদত্যাগৰ দাবীত উত্তাল হৈ পৰে বাংলাদেশ। কালিলৈ আন্দোলনকাৰীৰ বিৰুদ্ধে কঠোৰ অৱস্থানৰ ইংগিত দিছিল বাংলাদেশৰ প্ৰধানমন্ত্ৰীয়ে। কিন্তু আজি সেনা প্ৰধানৰ সকলো পক্ষক লৈ বৈঠকক বিশেষ তাৎপৰ্যপূৰ্ণ বুলি ধাৰণা কৰা হৈছে। None
What’s New
Spotlight
Advertisement
Featured News
Latest From This Week
Popular News
