NEWS
লোকসভা নিৰ্বাচনৰ পাছতেই তৎপৰ হৈ পৰিছে ৰাষ্ট্ৰীয় স্বয়ংসেৱক সংঘ। লোকসভা নিৰ্বাচনৰ ফলাফল ঘোষণাৰ পাছত হিন্দুত্ববাদী সংগঠনটোৱে শেহতীয়াকৈ অনুষ্ঠিত কৰিছে কেইবালানিও বৈঠক। ৰাষ্ট্ৰীয় স্বয়ংসেৱক সংঘৰ ‘সমন্বয় বৈঠক’ উত্তৰ প্ৰদেশৰ লগতে মধ্য প্ৰদেশতো আহ্বান কৰা হৈছে। কিছুদিন পূৰ্বে RSSৰ মুৰব্বী মোহন ভাগৱতে উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ সৈতে এখন ৰুদ্ধদ্বাৰ বৈঠকত মিলিত হোৱাৰ খবৰ পোৱা গৈছিল। দেশৰ ৰাজনৈতিক বিশ্লেষকসকলে এই বৈঠকসমূহক লোকসভা নিৰ্বাচনত বিজেপিৰ প্ৰদৰ্শনৰে সংযুক্ত কৰিছে। কিন্তু ৰাষ্ট্ৰীয় স্বয়ংসেৱক সংঘৰ বিষয়ববীয়াসকলে এই সভাবোৰক নিয়মীয়া বৈঠক বুলিয়ে অভিহিত কৰিছে। ৰাষ্ট্ৰীয় স্বয়ংসেৱক সংঘৰ সমন্বয় সভা কি? ইয়াত কি হয়, কোনে অংশগ্ৰহণ কৰে আৰু অৰ্থ কি? RSSৰ সাংগঠনিক আলোচনীৰ সম্পাদক তথা সংগঠনটোৰ এগৰাকী আগশাৰীৰ কাৰ্যকৰ্তা প্ৰফুল্ল কেটকাৰে ‘নিউজ১৮’ক কয় যে সমন্বয় সভাসমূহ সংঘৰ নিয়মীয়া অংশ। সমন্বয় সভা প্ৰধানতঃ দুই প্ৰকাৰৰ। প্ৰথমটো হৈছে আঞ্চলিক বা প্ৰদেশ পৰ্যায় আৰু দ্বিতীয়টো হৈছে ৰাষ্ট্ৰীয় পৰ্যায়, যাক সৰ্বভাৰতীয় সমন্বয় সভা বুলিও কোৱা হয়। কেটকাৰে কয় যে সংগঠনটোৰ বছৰটোৰ সময়সূচী প্ৰায় চূড়ান্ত হৈ আছে। মাৰ্চৰ আশে-পাশে প্ৰতিনিধি সভাৰ সৈতে আৰম্ভ হয় কাৰ্যসূচী। তাৰ পাছতে প্ৰাদেশিক বা আঞ্চলিক সমন্বয় সভা অনুষ্ঠিত হয়। তাৰ পাছত এখন ৰাষ্ট্ৰীয় সমন্বয় সভা অনুষ্ঠিত হয়। ইয়াৰ পাছত দীপাৱলীৰ সময়ত সংঘৰ এখন সৰ্বভাৰতীয় কাৰ্যনিৰ্বাহক সভা অনুষ্ঠিত হয়। সমন্বয় সভাত কোন কোন উপস্থিত থাকে? ৰাষ্ট্ৰীয় স্বয়ংসেৱক সংঘৰ সমন্বয় সভাত ইয়াৰ সহযোগী সংস্থাসমূহৰ ৩৬ জন সহযোগীসকল উপস্থিত থাকে। য’ত বিজেপিৰ সৈতে স্বদেশী জাগৰণ মঞ্চ, শিক্ষা মণ্ডল, সেৱা ভাৰতীৰ দৰে সকলো সংগঠন অন্তৰ্ভুক্ত কৰা হৈছে। সংঘৰ সৰ্বভাৰতীয় কাৰ্যালয়, যেনে সৰসংঘচলক, চৰকাৰিয়াভাই ৰাষ্ট্ৰীয় পৰ্যায়ৰ সমন্বয় বৈঠকত অংশগ্ৰহণ কৰে। বহুসময়ত সহযোগী সংগঠনৰ মন্ত্ৰীসকলকো ৰাষ্ট্ৰীয় সমন্বয় সভাত আমন্ত্ৰণ জনোৱা হয়। একেদৰে, আঞ্চলিক বা প্ৰদেশ পৰ্যায়ৰ সমন্বয় সভাত আৰ এছ এছৰ আঞ্চলিক প্ৰচাৰক অন্তৰ্ভুক্ত থাকে। ইয়াৰ উপৰি সহযোগী সংগঠনৰ সভাপতি আৰু সংগঠন মন্ত্ৰীসকলে অংশগ্ৰহণ কৰে। প্ৰফুল্ল কেটকাৰে লগতে কয় যে কেতিয়াবা ৰাষ্ট্ৰীয় আৰু আঞ্চলিক সমন্বয় সভাৰ উপৰি বিভাগীয় সমন্বয় সভাও অনুষ্ঠিত হয়। ইয়াৰ উপৰি সংঘৰ প্ৰতিনিধি সভা, ৰাষ্ট্ৰীয় সমন্বয় সভা আৰু প্ৰাদেশিক বা আঞ্চলিক সমন্বয় সভাত ইয়াৰ সৈতে জড়িত সংগঠনৰ বিষয়ববীয়াসকলক আহ্বান কৰাটোও গুৰুত্বপূৰ্ণ। কিন্তু কেৱল সংঘৰ বিষয়ববীয়াসকলহে কাৰ্যনিৰ্বাহক সভাত উপস্থিত থাকে। সংঘৰ সমন্বয় বৈঠকত কি আলোচনা চলে? আৰ এছ এছৰ সমন্বয় বৈঠকত মুখ্যতঃ দুটা প্ৰকাৰৰ বিষয় আলোচনা কৰা হয়। প্ৰথম – দেশৰ স্বাৰ্থৰ সৈতে সম্পৰ্কিত বিষয় আৰু দ্বিতীয়তে সংগঠনটোৰ নীতিৰ সৈতে সম্পৰ্কিত বিষয়। সংঘৰ প্ৰতিটো সংগঠনে এই সভাত নিজৰ বক্তব্য বেকত কৰে। ইয়াৰ পাছত এক সহমত গঠন কৰি ভৱিষ্যতৰ ৰূপৰেখা অংকন কৰা হয়। ৰাষ্ট্ৰীয় স্বয়ংসেৱক সংঘৰ এগৰাকী কৰ্মকৰ্তাই কয়, বহুতৰে এনেকুৱা ধাৰণা আছে যে আৰ এছ এছে সমন্বয় সভাত বিজেপিৰ পৰা ৰিপোৰ্ট কাৰ্ড লয়। কিন্তু সেয়া নহয়। সংঘই বিজেপিৰ কামত পোনপটীয়াকৈ হস্তক্ষেপ নকৰে, কিন্তু নিশ্চিতভাৱে পথ প্ৰদৰ্শন কৰে। তেওঁ লগতে কয় যে ৰাষ্ট্ৰীয় সমন্বয় বৈঠকৰ পাছত প্ৰাদেশিক বা আঞ্চলিক সমন্বয় বৈঠক অনুষ্ঠিত হয়। য’ত প্ৰদেশ প্ৰচাৰক, আঞ্চলিক সংগঠনৰ মন্ত্ৰীৰ দৰে বিষয়ববীয়াও অন্তৰ্ভুক্ত থাকে। সেই বৈঠকত অঞ্চল বা প্ৰদেশৰ বিষয়বোৰ আলোচনা কৰা হয়। তাৰ পাছত সেই বিষযয়ববীয়াসকলৰ জৰিয়তে সংশ্লিষ্ট প্ৰদেশ বা অঞ্চলৰ বিষয়বোৰ সৰ্বভাৰতীয় বৈঠকত উত্থাপিত হয়। পৰৱৰ্তী সময়ত এই বিষয়বোৰ বিবেচনা কৰা হয়, যদি কোনো আঁসোৱাহ থাকে, তেনেহ’লে ইয়াক আঁতৰাবলৈ চেষ্টা কৰা হয়। লোকসভা নিৰ্বাচনৰ পাছত প্ৰথমখন ৰাষ্ট্ৰীয় সমন্বয় বৈঠকঃ আৰ এছ এছৰ ৰাষ্ট্ৰীয় সমন্বয় বৈঠক ৩১ জুলাইৰ পৰা ২ আগষ্টলৈ কেৰালাৰ পালাক্কাডত অনুষ্ঠিত হ’ব। লোকসভা নিৰ্বাচনৰ ঠিক পাছতে অনুষ্ঠিত ৰাষ্ট্ৰীয় সভাখন গুৰুত্বপূৰ্ণ বুলি বিবেচিত হৈছে। এই বৈঠকত ৰাষ্ট্ৰীয় পৰ্যায়ত বিজেপিৰ আসন হ্ৰাস হোৱাৰ বিষয়টোৰ আৰু কেইবাখনো ৰাজ্যত সংঘৰ্ষৰ বিষয়টো আলোচনা হোৱাৰ সম্ভাৱনা আছে। চৰকাৰৰ সহযোগী আন দলসমূহৰ দাবীবোৰেও বৈঠকত স্থান পোৱাৰ সম্ভাৱনা আছে। উল্লেখযোগ্য় যে আৰ এছ এছৰ অন্তিমখন সমন্বয় বৈঠক পুনেত অনুষ্ঠিত হৈছিল। ৰাজনৈতিক বিশ্লেষকসকলে কয় যে এইবাৰ বৈঠকৰ স্থান কৌশলগতভাৱে কেৰালাক বাছনি কৰা হৈছে, কিয়নো বিগত লোকসভা নিৰ্বাচনত প্ৰথমবাৰৰ বাবে বিজেপিয়ে ৰাজ্যখনত নিজৰ ‘খাটা’ খুলিবলৈ সক্ষম হৈছিল। এই বৈঠকৰ জৰিয়তে সংঘ আৰু বিজেপিয়েও দাক্ষিণাত্যৰ ৰাজনীতিত দিব বিচাৰিছে বিশেষ বাৰ্তা। None
What’s New
Spotlight
Advertisement
Featured News
Latest From This Week
Popular News
