NEWS
Photo Courtesy- The Olympic Games/ X account লেডী গাগা। জিনেদাইন জিদান। গ্ৰেট ব্ৰিটেইনৰ দুই পতাকা বাহক ডাইভাৰ টম ডালে আৰু ৰোৱাৰ হেলেন গ্লোবাৰৰ টাইটানিকৰ সেই বিখ্যাত প’জৰ স্মৃতি ঘূৰাই অনা। ফৰাচী বিপ্লৱক শ্ৰদ্ধা জনোৱা। ঐতিহাসিক ছেন নদীত অভিনৱ, অনন্য উদ্বোধনী অনুষ্ঠান পেৰিছ অলিম্পিকৰ। নতুনত্বৰ সৈতে প্ৰাচীন ঐতিহ্যৰ চমৎকাৰেৰে উজলি উঠিল পেৰিছ অলিম্পিকৰ উদ্বোধনী অনুষ্ঠান। বিভিন্ন দেশৰ খেলুৱৈসকলে ছেন নদীৰে নিজ দেশৰ পতাকা বহন কৰি লৈ যোৱাৰ সেই দৃশ্যই বুজাই দিলে এইবাৰৰ পেৰিছ অলিম্পিকে বিশ্বক চমক দিবলৈ সাজু। যি অনুষ্ঠানক লৈ সমগ্ৰ বিশ্বই আগ্ৰহেৰে বাট চাইছিল, সেই প্ৰত্যাশা পূৰণ হোৱাই নহয়, এক নতুন দিগন্ত খুলি দিলে ক্ৰীড়া উদ্বোধনৰ ক্ষেত্ৰত। ষ্টেডিয়ামৰ বন্ধ পৰিৱেশত নহয়, পেৰিছে খুলি দিলে উদাৰ মনোভাৱৰ দুৱাৰ। ছেন নদীৰ পাৰত বহি সেই চমকলগা উদ্বোধনী অনুষ্ঠান প্ৰত্যক্ষ কৰি আচৰিত সমগ্ৰ বিশ্ব। যেন ‘এন ইভিনিং ইন পেৰিছ’ৰ দৰে জনপ্ৰিয় চিনেমা। কোনে ক’ব এই পেৰিছেই আতংকৰ চহৰ হৈ পৰিছিল গেমছৰ উদ্বোধনক কেন্দ্ৰ কৰি। বহুতেই প্ৰশ্ন তুলিছিল, ইয়াত ইমান ৰাজনৈতিক যুঁজ চলিছে। শেহতীয়াকৈ নিৰ্বাচন অনুষ্ঠিত হৈছে আরু কোনো দলেই নিৰংকুশ সংখ্যাগৰিষ্ঠতা লাভ কৰা নাই। এককভাৱে কোনেও চৰকাৰ গঠন কৰিব পৰা নাই। নানা সন্ত্ৰাসবাদী আক্ৰমণৰ আতংকৰ সৃষ্টি হৈছিল। আনকি ভাবুকিও আহিছিল যে অলিম্পিকৰ মাজত ভয়ংকৰ পৰিস্থিতি হ’ব, যিদৰে ২০১৫ চনৰ সেই ভয়ংকৰ আক্ৰমণত বিধ্বস্ত হৈছিল ফ্ৰান্স। এইবোৰৰ মাজতো ৰাষ্ট্ৰপতি ইমানুৱেৰ মেক্ৰ’ আৰু পেৰিছ চহৰৰ মেয়ৰ এনি ইৰালগোৱে তেওঁলোকৰ সংকল্পৰ প্ৰতি অটল আছিল। সমগ্ৰ বিশ্বৰ চাপত নতিস্বীকাৰ নকৰি ছেন নদীত মুকলি আকাশৰ তলত উদ্বোধনী অনুষ্ঠান কৰি দেখুৱাই দিব, সন্ত্ৰাসবাদীৰ ভাবুকিত পৃথিৱী নচলে। চলে মানুহৰ ইচ্ছাত। আৰু সেয়াই কৰি দেখুৱালে। নানা ৰং, কৃষ্টি-সংস্কৃতিৰ সমাহাৰ, নানা ইতিহাসৰ ৰামধেনুবৰণীয়া উদ্বোধনী অনুষ্ঠান দেখি ধাৰণা হৈছিল, এয়া যেন অকল অলিম্পিকৰ উদ্বোধনী অনুষ্ঠান নহয়, পেৰিছে যেন সমগ্ৰ বিশ্বকে অনুপ্ৰাণিত কৰি বাৰ্তা দিলে যে জীয়াই থাকক, প্ৰাণ খুলি জীয়াই থাকক। নিজৰ ইচ্ছা মতে জীয়াই থাকক। পুৱাৰে পৰা পেৰিছত বৰষুণ আৰম্ভ হৈছিল। উদ্বোধনী অনুষ্ঠানৰ পূৰ্বে আৰু বৃদ্ধি পায় বৰষুণ। অধিকাংশ দৰ্শক মুকলি আকাশৰ তলত। অলিম্পিকৰ স্বেচ্ছাসেৱকসকলে পাতল ৰেইনকোটৰ লেখীয়া পাতল প্লাষ্টিক বিতৰণ কৰা দেখা যায়। আৰু সেয়া মূৰত লৈয়ে সকলো বহি ছেন নদীৰ পাৰত এই অভিনৱ সন্ধিয়া উপভোগ কৰে। ভাবুকি, বৰষুণ একোৱেই পেৰিছবাসীৰ মনোবল হ্ৰাস কৰিব নোৱাৰিলে। য’ত বহি উদ্বোধনী অনুষ্ঠান, তাৰ পিছফালেই আইফেল টাৱাৰ। এক মায়াময় পৰিৱেশ হয়তো পুনৰবাৰ দেখা নাযাব। ছেন নদীত ‘এন ইভিনিং ইন পেৰিছ’ৰ শ্ব’ চাব নে ডিঙি ঘূৰাই আইফেল টাৱাৰৰ সৌন্দৰ্য উপভোগ কৰিব। সঁচাকৈ অনন্য। নাৱেৰে ছেন নদীৰ বুকুত মাৰ্চপাষ্ট! নাৱতে আহিল ভাৰতীয় দল। দুই পতাকা বাহক পি ভি সিন্ধু আৰু শৰথ কমলে হাত জোকাৰিছে। আনন্দিত সকলো। কোনো খেলৰ উদ্বোধনী অনুষ্ঠানত দেখা যোৱা নাছিল এনে দৃশ্য। পেৰিছক যে ফেশ্বন কেপিটেলো কোৱা হয়, সেয়াও মনত পেলাই দিলে বিশ্বক। ছেন নদীৰ দলঙৰ ওপৰত দেখা গ’ল ‘কেটৱাক’। নদীৰ পাৰত সংগীতৰ মায়াজাল। পেৰিছত অলিম্পিকৰ উদ্বোধন, আৰু আবেগৰ ঢৌ নাথাকিব, হ’বই নোৱাৰে! ফ্ৰান্সৰ নাও যেতিয়া উপস্থিত হ’ল, পোহৰেৰে জিকমিক কৰি উঠিল আইফেল টাৱাৰ। যি দৃশ্য দেশি আচৰিত সমগ্ৰ বিশ্ব। আটাইতকৈ নাটকীয় মুহূৰ্ত আছিল আইফেল টাৱাৰৰ তলৰ পৰা ৰাইড কৰি ওলাই অহা এগৰাকী অচিনাকি মহিলা। যাৰ দেহত অলিম্পিকৰ পতাকা। আইফেল টাৱাৰক ‘আইৰন লেডী’ কোৱা হয়। তাৰেই প্ৰতীক নেকি? আলেকজান্দ্ৰে থ্ৰীৰ পৰা ৬ কিলোমিটাৰ পথজুৰি উদ্বোধনী অনুষ্ঠানৰ আৰম্ভ হৈছিল। শেষ হয় চোকাদহত। ফৰাচী ৰাষ্ট্ৰপতি মেক্ৰ’, আন্তৰ্জাতিক অলিম্পিক কমিটীৰ প্ৰধান টমাছ বাখ, আয়োজক কমিটীৰ প্ৰধান টনি এস্তাংগুৱেদ, সকলো উপস্থিত আছিল। প্ৰায় চাৰে তিনি ঘণ্টা ধৰি চলিল অনুষ্ঠান। জিদানে আহি অলিম্পিক শিখা তুলি দিলে ফ্ৰান্স অপেনৰ অবিসম্বাদী সম্ৰাট ৰাফেল নাদালৰ হাতত। জয়ধ্বনি উঠিল, ‘জিজু জিজু জিজু’। আৰম্ভ হয় লেজাৰ শ্ব’। পোহৰৰ মায়াজালে আৰু বৰ্ণময় কৰি তোলে আইফেল টাৱাৰক। কেৱল ছেন নদীয়ে নহয়। সমগ্ৰ চহৰৰ নানা প্ৰান্তত উদ্বোধনী অনুষ্ঠানৰ উৎসৱ চলিল। ক’ৰবাত নৃত্যৰ অনুষ্ঠান, ক’ৰবাত গীতৰ। সম্পূৰ্ণ অন্য ভাৱনাৰ এক উদ্বোধনী অনুষ্ঠানৰ সাক্ষী হ’ল বিশ্ব, যিয়ো পূৰ্বে কোনেও কল্পনা কৰা নাছিল। উদ্বোধনী অনুষ্ঠানৰ দৰেই হৃদয় জিনিলে ৰয়িং কিংবদন্তি এস্তাংগুৱেদৰ বক্তব্যই। তেওঁ কয়, ‘‘সমগ্ৰ বিশ্বক আমি দেখুৱাব বিচাৰিছিলো যে এয়া পেৰিছ। ইয়াত সকলো দেশৰ মানুহক স্বাগতম। সকলো ধৰ্মক স্বাগতম। সকলো সম্প্ৰদায়ক স্বাগতম।’’ খেলুৱৈসকলক উদ্দেশ্যি তেওঁ কয়, ‘‘পেৰিছ প্ৰেমৰ চহৰ। আৰু আগন্তুক কিছুদিন আপোনালোকৰ চহৰ। কাইলৈৰ পৰা আপোনালোকৰ জয় আমাৰ জয়, আপোনালোকৰ পৰাজয় আমাৰ পৰাজয়।’’ None
What’s New
Spotlight
Advertisement
Featured News
Latest From This Week
Popular News
