NEWS
শীঘ্ৰেই কৰ্মচাৰী ভৱিষ্যনিধি সংগঠনৰ সদস্যসকলে হয়তো এটিএমৰ পৰাই উলিয়াব পাৰিব ধন। ভাৰতৰ কৰ্মশক্তিক বৰ্ধিত সুবিধা প্ৰদানৰ উদ্দেশ্যে শ্ৰম আৰু নিয়োগ মন্ত্ৰণালয়ে নিজৰ আই টি ছিষ্টেম উন্নীত কৰি আছে। সংবাদ প্ৰতিষ্ঠান এ এন আইক এই কথা জনালে শ্ৰম সচিব সুমিতা ডাৱৰাই। কোনে এটিএমৰ জৰিয়তে পিএফৰ ধন উলিয়াব পাৰিব? ডাৱৰাই এএনআইক কয় যে, ‘‘দাবীদাৰ, হিতাধিকাৰী বা বীমাকাৰী ব্যক্তিয়ে এটিএমৰ জৰিয়তে সুবিধাজনকভাৱে তেওঁলোকৰ দাবী লাভ কৰিব পাৰিব।’’ সংবাদ মাধ্যমৰ বাতৰি অনুসৰি, মুঠ পিএফ বেলেঞ্চৰ ৫০% টকা উলিওৱাৰ সীমা নিৰ্ধাৰণ কৰা হ’ব। ইপিএফঅ’ৰ সদস্যসকলে এটিএম ব্যৱহাৰ কৰি তেওঁলোকৰ দাবীৰ ধন পোনপটীয়াকৈ উলিয়াব পাৰিব। ইপিএফঅ’ই বেংক একাউণ্ট ইপিএফ একাউণ্টৰ সৈতে সংযোগ কৰাৰ অনুমতি দিছে যদিও এই সংযোগ এটিএমৰ পৰা ধন উলিওৱাৰ বাবে ব্যৱহাৰ কৰিব নে পৃথক ব্যৱস্থা প্ৰৱৰ্তন কৰিব সেয়া স্পষ্ট নহয়। কোনো সদস্যৰ মৃত্যু হ’লে হিতাধিকাৰীসকলে এই এটিএম উইথড্ৰ’ৰ সুবিধা ব্যৱহাৰ কৰাৰ যোগ্য হ’ব পাৰে। এই সুবিধাৰ বাবে হিতাধিকাৰীসকলে নিজৰ বেংক একাউণ্টসমূহ মৃত সদস্যৰ ইপিএফ একাউণ্টৰ সৈতে সংযোগ কৰিব লাগিব। অৱশ্যে এই সন্দৰ্ভত আনুষ্ঠানিক ঘোষণালৈ অপেক্ষা কৰিব লাগিব। এমপ্লইজ ডিপ’জিট লিংকড ইন্সুৰেঞ্চ (EDLI) স্কীমৰ জৰিয়তে মৃত ইপিএফঅ’ সদস্যৰ আইনী উত্তৰাধিকাৰীক সৰ্বাধিক ৭ লাখ টকাৰ বীমা সুবিধা প্ৰদান কৰা হয়। শ্ৰম সচিবগৰাকীয়ে উল্লেখ কৰে যে এটিএমৰ জৰিয়তেও বীমাৰ দাবী উলিয়াব পাৰিব। অৰ্থাৎ মনোনীত আৰু আইনী উত্তৰাধিকাৰীয়ে এই এটিএম উইথড্ৰ’ৰ সুবিধা ব্যৱহাৰ কৰিব পাৰিব। কিন্তু ইয়াক সক্ষম কৰিবলৈ মনোনীত বা আইনী উত্তৰাধিকাৰীয়ে দাবী নিষ্পত্তিৰ বাবে মৃত সদস্যৰ ইপিএফ একাউণ্টৰ সৈতে নিজৰ বেংক একাউণ্ট লিংক কৰিব লাগিব। কেতিয়া এ টি এমৰ পৰা পি এফ উলিয়াব পাৰিব? শ্ৰম সচিবগৰাকীয়ে লগতে কয় যে আমি দাবীসমূহ দ্ৰুতভাৱে নিষ্পত্তি কৰিছো আৰু জীৱন-যাপনৰ প্ৰক্ৰিয়া সহজ কৰি তুলিবলৈ কাম কৰিছো। শ্ৰম সচিবগৰাকীয়ে এএনআইক কয় যে, “ব্যৱস্থাসমূহৰ বিকাশ ঘটিছে আৰু প্ৰতি দুমাহৰ পৰা তিনিমাহৰ মূৰে মূৰে আপুনি উল্লেখযোগ্য অগ্ৰগতি লক্ষ্য কৰিব। মই বিশ্বাস কৰোঁ যে ২০২৫ চনৰ জানুৱাৰী মাহৰ ভিতৰত ইয়াৰ এক বৃহৎ উন্নতি হ’ব।” এই পৰিৱৰ্তনৰ বাবে নিৰ্দিষ্ট সময়সীমা এতিয়াও প্ৰকাশ কৰা হোৱা নাই। ইপিএফ উলিওৱাৰ নিয়মৰ ব্যাখ্যা অৱসৰৰ বয়স ৫৫ বছৰ হোৱাৰ পিছত ইপিএফঅ’ৰ সদস্যসকলে সমগ্ৰ ধন উলিয়াব পাৰিব। অৱসৰৰ এবছৰৰ আগতেও ৯০% ধন উলিয়াব পাৰে। ইপিএফঅ’ৰ সদস্যসকলে নিবনুৱা সমস্যা, চিকিৎসা জৰুৰীকালীন অৱস্থা, ঘৰ ক্ৰয় বা নিৰ্মাণ, সদস্য/ভাই-ভনী/শিশুৰ বিয়া, বা ঘৰ সংস্কাৰ আদি ক্ষেত্ৰতো ধনৰ এটা অংশ উলিয়াব পাৰে। দাবীৰ সীমা কাৰণৰ ওপৰত নিৰ্ভৰ কৰে। কৰ্মচাৰীসকলে দাখিল কৰিব পৰা দাবী প্ৰ-পত্ৰসমূহ কি কি? (ক) পি এফ ফাইনেল ছেটেলমেণ্ট (ফৰ্ম 19) (খ) পেঞ্চন উলিওৱাৰ সুবিধা (ফৰ্ম 10-C)আৰু (গ) পি এফ অংশ উলিওৱাৰ বাবে (Form 31) আবেদন কৰিব পাৰে। ইপিএফঅ’ উইথড্ৰ’ৱেল : অনলাইন দাবী দাখিল কৰাৰ বাবে সদস্যৰ পৰা কি কি প্ৰয়োজনীয়তা আছে? সদস্যই তলত দিয়া চৰ্তসমূহ পূৰণ কৰিব লাগিব: ক) সদস্যজনে নিজৰ ইউনিভাৰ্ছেল একাউণ্ট নম্বৰ (UAN) সক্ৰিয় কৰিব লাগিব আৰু ইউএএন সক্ৰিয় কৰাৰ বাবে ব্যৱহাৰ কৰা মোবাইল নম্বৰ কৰ্মক্ষম অৱস্থাত থাকিব লাগিব। খ) সদস্যৰ আধাৰৰ সবিশেষ ইপিএফঅ’ ডাটাবেছত দাখিল কৰিব লাগে আৰু তেওঁ দাবীৰ সময়ত UIDAIৰ পৰা eKYC ভেৰিফাই কৰাৰ বাবে অ’টিপি লাভ কৰিব। গ) IFSC ক’ডৰ সৈতে সদস্যৰ বেংক একাউণ্ট EPFO ডাটাবেছত দাখিল কৰিব লাগে। ঘ) তেওঁৰ সেৱা পাঁচ বছৰৰ কম থাকিলে পিএফৰ চূড়ান্ত নিষ্পত্তি দাবীৰ বাবে ইপিএফঅ’ ডাটাবেছত স্থায়ী একাউণ্ট নম্বৰ (পেএন) দাখিল কৰিব লাগে। None
What’s New
Spotlight
Advertisement
Featured News
Latest From This Week
Popular News
