NEWS
কাৰ্গিল যুদ্ধত শ্বহীদ হোৱা গ্ৰেনেডিয়াৰ চিন্ময় ভৌমিক। আজি কাৰ্গিল বিজয় দিৱস। ১৯৯৯ চনত পাকিস্তানৰ বিৰুদ্ধে ঐতিহাসিক কাৰ্গিল যুদ্ধত ৫০০ৰো অধিক ভাৰতীয় সেনা জোৱান শ্বহীদ হৈছিল। ১৯৯৯ চনৰ ৫ মে আৰম্ভ হৈছিল কাৰ্গিল যুদ্ধ। প্ৰায় তিনিমাহ ধৰি চলিছিল এই যুদ্ধ। এই যুদ্ধত শ্বহীদসকলৰ ভিতৰত উল্লেখযোগ্য নাম আছিল কেপ্তেইন বিক্ৰম বতৰা, লেফটেনেণ্ট মনোজ কুমাৰ পাণ্ডে আৰু ৰাইফলমেন সঞ্জয় কুমাৰ। কাৰ্গিল যুদ্ধৰ ‘অপাৰেচন বিজয়’ৰ অংশ আছিল অসমৰ বৰাক উপত্যকাৰ কাছাৰ জিলাৰ এগৰাকী সেনা জোৱানো। গ্ৰেনেডিয়াৰ চিন্ময় ভৌমিক ‘অপাৰেচন বিজয়’ত কেৱল প্ৰাণ আহুতি দিয়াই নহয়, মৃত্যুৰ পূৰ্বে দুজন সন্ত্ৰাসবাদীকো হত্যা কৰিছিল। আজিৰ এই বিশেষ দিনটোত সকলোয়ে শ্বহীদ চিন্ময় ভৌমিকক শ্ৰদ্ধাৰে সোঁৱৰিছে। গ্ৰেনেডিয়াৰ চিন্ময় ভৌমিক কাছাৰ জিলাৰ বৰখলা বিধানসভা সমষ্টিৰ অন্তৰ্গত শিলচৰৰ পৰা প্ৰায় ২০ কিলোমিটাৰ নিলগৰ জাৰইলতলা গাঁৱৰ বাসিন্দা আছিল। অদম্য সাহসিকতাই একমাত্ৰ পৰিচয় আছিল তেওঁৰ । ১৯৮৫ চনত সীমান্ত সুৰক্ষা বাহিনীত যোগদান কৰিছিল চিন্ময় ভৌমিক। পিছত তেওঁক কাৰ্গিল যুদ্ধত গ্ৰেনেডিয়াৰ হিচাপে সন্ত্ৰাসবাদৰ বিৰুদ্ধে যুঁজ দিছিল। যুদ্ধত বীৰত্বপূৰ্ণ মৃত্যুৰ পূৰ্বে প্ৰায় ১৪ বছৰ নিষ্ঠাৰে সেৱা আগবঢ়াইছিল চিন্ময়ে। এখন সৰু গাঁৱৰ পৰা কাৰ্গিলৰ যুদ্ধক্ষেত্ৰলৈ তেওঁৰ এই যাত্ৰা তেওঁৰ নিষ্ঠা আৰু দেশপ্ৰেমৰ প্ৰমাণ। ১৯৯৯ চনৰ কাৰ্গিল যুদ্ধ চলি থকাৰ সময়ছোৱাত ১৫ জুন নিশা চিন্ময় অভিযানৰ সময়ত শ্বহীদ হৈছিল যদিও মৃত্যুৰ পূৰ্বে শত্ৰুৰ দুজন সন্ত্ৰাসবাদীক হত্যা কৰিবলৈ সক্ষম হৈছিল। সেনাবাহিনীত একমাত্ৰ শ্বহীদ চিন্ময় নহয় তেওঁৰ ভাতৃ সন্তোষ কুমাৰ ভৌমিকো এজন অৱসৰপ্ৰাপ্ত আৰ্মি মেডিকেল অফিচাৰ আছিল। কনিষ্ঠ ভাতৃ সজল ভৌমিক এতিয়াও সেনাবাহিনীত কৰ্মৰত আছে। গ্ৰেনেডিয়াৰ চিন্ময় ভৌমিক প্ৰায় ১৪ বছৰ ধৰি ভাৰতীয় সশস্ত্ৰ বাহিনীক নিষ্ঠা আৰু সন্মানেৰে সেৱা আগবঢ়াইছিল। কাৰ্গিল যুদ্ধত তেওঁৰ বলিদান তেওঁৰ বীৰত্ব আৰু দেশৰ প্ৰতি থকা দায়বদ্ধতাৰ প্ৰমাণ। বৰাক উপত্যকা তথা গোটেই দেশৰ জনসাধাৰণৰ বাবে তেওঁ এক প্ৰেৰণা। None
What’s New
Spotlight
Advertisement
Featured News
Latest From This Week
Popular News
