NEWS
গাজাৰ শিবিৰত আত্মীয়ক হেৰুওৱাৰ হাহাকাৰ (ফটো : এ এফ পি) সকলো হেৰুৱাই তম্বুৰ তলত আশ্ৰয় লৈছিল তেওঁলোকে। তাৰ পিছতো নিস্তাৰ নাপালে। ইজৰাইলৰ সেনা বাহিনীৰ বোমা বৰ্ষণ আৰু আকাশমাৰ্গেৰে কৰা আক্ৰমণত প্ৰাণ হেৰুৱালে কমেও ৩৭জন পেলেষ্টাইনী লোকে। মঙলবাৰে গাজাৰ ৰাফাহ চহৰত এই ভয়ংকৰ আক্ৰমণ সংঘটিত কৰে ইজৰাইলে। আশ্ৰয় শিবিৰত থকা নিৰীহৰ ওপৰত আক্ৰমণৰ ঘটনাক লৈ ইজৰাইলৰ ওপৰত ক্ষুব্ধ বিশ্বৰ একাধিক দেশ। তাৰ ভিতৰত ইজৰাইলৰ একাংশ বন্ধু ৰাষ্ট্ৰও আছে। ইজৰাইলৰ ওপৰত হেঁচা প্ৰদান কৰি স্পেইন, নৰৱে’ আৰু আয়াৰলেণ্ডে পেলেষ্টাইনক ৰাষ্ট্ৰ হিচাপে স্বীকৃতি দিয়াৰ সিদ্ধান্ত লৈছে। গাজাৰ স্বাস্থ্য বিভাগৰ বিষয়াসকলে অৱশ্যে এই আক্ৰমণত নিহতৰ সংখ্যা ৪৫জন বুলি দাবী কৰিচে। ইজৰাইলী সেনাই প্ৰথমে এই আক্ৰমণৰ দোষ পেলেষ্টাইনৰ সন্ত্ৰাসবাদী সংগঠন হামাছলৈ ঠেলাৰ চেষ্টা কৰিছিল। তেওঁলোকে দাবী কৰে, হামাছৰ সন্ত্ৰাসবাদীয়ে নিক্ষেপ কৰা অস্ত্ৰৰ বিস্ফোৰণ ঘটি সেই আশ্ৰয় শিবিৰত এই প্ৰাণহানিৰ ঘটনা সংঘটিত হয়। পিছত অৱশ্যে ইজৰাইলৰ সেনা বাহিনীৰ মুখপাত্ৰই স্বীকাৰ কৰে, সেই আশ্ৰয় শিবিৰত হামাছৰ দুই শীৰ্ষ নেতা লুকাই আছিল বুলি তেওঁলোকৰ হাতত খবৰ আছিল। সম্ভৱত সেই দুই সন্ত্ৰাসবাদীক টাৰ্গেট কৰিবলৈ গৈ এই বিপৰ্যয় সংঘটিত হয়। এই ঘটনাক দুৰ্ভাগ্যজনক বুলি মন্তব্য কৰিছে ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে। জানিব পৰা মতে, বোমা বৰ্ষণৰ ফলত প্ৰথমে সেই শিবিৰত জুই লাগে। ইয়াৰ পিছত সেই জুইৰ পৰা শিবিৰত থকা ৰন্ধন গেছ, মজুত কৰি ৰখা ইন্ধনৰ বিস্ফোৰণ ঘটি জীৱন্তে অগ্নিদগ্ধ হয় বহু লোক। নিহতসকলৰ ভিতৰত শিশু আৰু মহিলাও আছে। এওঁলোকৰ অধিকাংশই যুদ্ধৰ ফলত সকলো হেৰুৱাই গাজাৰ বিভিন্ন প্ৰান্তৰ পৰা নিৰাশ্ৰয় হৈ সেই শিবিৰ আশ্ৰয় লৈছিল। বিগত কিছুদিন ধৰি গাজা চহৰৰ পশ্চিম প্ৰান্তত আক্ৰমণ চলাইছে ইজৰাইলী সেনাই। সেই অঞ্চল খালী কৰি দিয়াৰ বাবেও সাধাৰণ জনতাক সেনা বাহিনীৰ ফালৰ পৰা নিৰ্দেশ দিয়া হৈছে। পূব, মধ্য গাজাও দখল কৰিবলৈ আৰম্ভ কৰিছে ইজৰাইলী সেনাই। গাজা আৰু মিছৰ সীমান্ত অঞ্চলতো প্ৰৱেশ কৰিছে তেওঁলোকে। গাজাত এই আগ্ৰাসন আগনবঢ়াবলৈ ইতিমধ্যে ইজৰাইলক সতৰ্ক কৰি দিছে তেওঁলোকৰ আটাইতকৈ বন্ধু হিচাপে পৰিচিত আমেৰিকাই। এই ধৰণৰ আক্ৰমণ চলোৱাৰ বাবে ইজৰাইলক তেওঁলোকে আৰু অস্ত্ৰ সৰবৰাহ নকৰিব বুলি সতৰ্ক কৰি দিয়ে বাইডেন প্ৰশাসনে। অবিলম্বে গাজাত এই আগ্ৰাসন বন্ধ কৰাৰ বাবে ইজৰাইলক নিৰ্দেশ দিছে আন্তৰ্জাতিক ন্যায় আদালতেও। অৱশ্যে এই নিৰ্দেশনা পালন কৰাৰ বাবে ইজৰাইলক বাধ্য কৰাৰ ক্ষমতা আন্তৰ্জাতিক ন্যায় আদালতৰ নাই। None
What’s New
Spotlight
Advertisement
Featured News
Latest From This Week
Popular News
